ХIОЦОСА НАЖМУДИН,

Дагъистаналъул анлъабилев Имам,

кIудияв гIалимчи.

ЦIакъ урхъараб цо салам дица битIулеб буго,

Жинде гьидаят бугев Муршидун Камиласде.

Гьесул вагIзаби руго, гьезул цо мугь рехани,

Чиясул ракIалда тIад анкьго тIор базабулел.

Такъваялъул гьел чIорал чиясде жал щванани,

Диналъул нураз гьесул ракI чIаголъизабулеб.

Булбул хIанчIи ахIтIола рекIел гIаркьелазда тIад,

Гьав нилъер Сайидасул манакъибалги рицун.

ТIадегIанлъиялъул гохI гьелъулги бетIералда,

Устар веццун цIалдола зобалазул тIайпусал.

РакIалъе гьев вокьулеб рокьи дир цIазе ккани,

Цониги инсанасда хIисаб кьезе кIвеларо.

Дол нилъеца рорчIарал Хунзахъ рукIарал сардал,

Гьанже ракIалде щведал чваххула берзул магIу.

Берал къанщигун рекIел беразда цеве вачIун,

Дудехун бугеб рокьи рукьбазулъ щущан уна.

Бичас дие кьунани цойгиги гьесул хурхен,

Кьижунилан макьилъги суратги кIоченаро.

Гьесулгун мадугьалихъ, гьесул лъаялъул ралъдалъ,

Лъедолевлъун вукIина Бичас нигIмат кьурав чи.

 ***  Нажмудинил назму гIараб мацIалда хъвараб

 

АЛМАХЪАЛДАСА ГIАМИРГIАЛИХIАЖИ

 Халкъалъул халат накълолъун вуго.

ГIобода бижараб жавгьаралъул гъветI,

ГIарабустаналда паналъун буго.

Жумадил Багъдади, Заванил Мисри,

Дурго хIабибасда аскIовищ арав?

Улка хараблъула ханзаби хвани,

Дунял хараблъана мун тIаса индал.

Дур гIамал бахунеб зобалъул гъапу,

МахIрумгойищ тараб, хирияв эмен.

ГIибадат гьабулел хириял бакIал,

Хараблъунищ тарал, гIазизав устар.

Дуца дин малъарал дур муридзаби,

Данде-гъанде руссун гъар-гъар бан руго.

Мун тIаде сверулеб диналъул агьлу

Мун тIаса къотIидал къваридго руго.

Фатва- тавхIидалъе Имам Навави,

Сияр-сулукалъе Имам Гъазали,

Къварилъи рехана дур хъизамалде,

Дуниял бецIлъана дур лъималазе.

Хабарищ бачIараб Сугъуриясул

 Барзахалъул болъе мун лъугьанилан.

Каламищ рещтIараб Ярагъиясул

Панаяб дуниял жибго тейилан.

Ай, бухIаяб хIухьел, диналъул вацал,

Дагъистаналдего балагь рещтIана.

БухIараб магIу тIе гьал гIащикъзаби,

Дунялалъул къутIбу къокъун аравин.

Бархазалъул агьлу хадубги гьабун,

Сугъурияв дуда данде вачIинчIищ?

Дудехун гIащикъал гIадамал рачун,

Габунив хурхинчIищ дов Ярагъияв?

Нижер салам бице Маймунатида,

Къварилъи лъазабе Хадижатида.

Цоцаздехун русса ал муридзаби,

Нужеда тIад бугеб бакъул нур сванин!

Чамасдакил гъотIол кьалбал ракъвайдал,

Дир рекIел мащаби щущалел руго.

Дунялалъул къутIбу къокъаралдаса,

Къваридаб дир керен бухIулеб буго.

Байтуллагь сверулеб сурмияб микки,

Милъир хIулун буго, хIал дагьлъун буго.

ХIарамалда жаниб хIавагIечул гъветI,

ХIакъдилел нилъги тун, махI къотIун буго.

РачIа къварилъизин къварилъи щварал,

«ИбнухIажаралда» хIур кколеб бугин.

Я, хирияв эмен, гIазизав устар,

ГIамал загIипалин ниж рехун тоге.

Забаниятаз ккун ниж рачунелъул,

Аман, Сайид, дуда ниж кIочон тоге.

Хирав ХIабибасда аскIов унелъул,

Нижер кIарчамлъаби эсда рицунге.

Дудехун битIараб кваранабаб квер,

КъотIун реханиги нахъе цIаларо.

ГIищкъуялъ рухIулел рекIел мащаби,

Ралъдалъ ччунаниги цIаги ссвинаро.

Я, диналъул вацал, дунял бецI буго,

Сайид къокъун арал къоял квеш руго.

Гъоркьан пихъ къотIулеб чамасдакил гъветI,

Угьдилел нижги тун, гочунищ арав.

Чабхилъан баккулеб гьуинаб Зам-зам,

Гьекъезе щвечIого къунгойищ ккараб?

ГIищкъуялъ рухIулел ал хIажизаби,

ТIаде гIунтIилалде къо рехун буго.

Мун цевеги тIамун, тIавап гьабулел,

ТIупан тIунин абун угьдилел руго.

Дудехун гIащикъав ГIамиргIалица,

Бераз магIу тIола дур бицунелъул.

Дур бицун мехтарав Аргъваниясул

Дур сипатал гьарун свакайго гьечIо.

Вахъа, ГIободияв, гьезул квер босе,

Мун вихьизейилан гьенирги рачIун,

Дур хоб бихьун тараб къиямасеб къо!

 

ХУШТАДАСА САЙИДХIУСЕН

 Аллагьасеﷻ рецц гьабун, ХIабибасе салам кьун,

Байбихьизин кIалъазе, гIинтIаме муридзаби.

Гьалда хадуб бицинин нилъерго Сайидасул,

АхIмадил умматалъе гьесул бугеб шапагIат.

Ахир заманаялъул загIипал гIадамазе,

РахIмат жинца гьабизе Аллагьасеﷻ бокьидал,

Уммат хвасар гьабизе вализаби рижана.

Гьезий дугIа гьабизе, тIолго халкъ тIобитIизе,

БетIергьанас изну кьун, ГIободияв вижана.

Халкъалъего рахIматлъун РахIманас жив гьавуна,

Накъшубандалъул шайхас шаргIалда байбихьана.

Таклибалъул захIмалъи гьесие бигьалъана,

Кирамул катибиназ кверда убач гьабуна.

Гьесул караматалъул кIодолъаби рихьидал,

ГIаламулагьаталда гьесий кьурал гьунарал,

ХIабиб гурев чиясда хIисаб гьабун кIоларо.

Алжаналъул микьабго рагьаби рагьун руго,

Малакул гIаламалъул нурул хIисаб борхана.

Гьанже рачIа гIинтIаме, гIащикъал муридзаби,

Нилъерго устарасул караматал рагIизе.

Алжаналъул махIазул раваихIал чваххана,

Магърибгун Машрикъалда фуюзал тIиритIана.

Къасаваталъ мехтарал щуазарго мунафикъ,

РакIазе иршад гьабун, муридзаби гьаруна.

Аллагьасﷻ изнуги кьун, Расулуллагь разилъун,

ТIарикъаталъул изну эсда кодобе кьуна.

АнцIила кIиазарго равхIаниявги вачIун,

Муршид зодов вачиндал, зоб-ракь нуралъул цIуна.

Квешлъи, лъикIлъаби хъвалел малаикзазул кверал,

Квараниса рехулеб лъикIлъи гьесие кьуна.

АнцIила кIиазарго жужахI тIадал гIадамал,

ГIазабалдаса рахъун нигIматалде рехана.

Нурал руго загьирлъун, зобал руго берцинлъун,

ХIурулгIинал гIащикълъун гIадаллъулеб куцалда.

Гьесдехун ракI лъикI гьабун, дунялалда хьвадарал,

Муридлъун гьечIониги алжаналде вачуна.

Гьев къутIбуясул къадру кIодо гьавурав мурид,

Къиямасеб къо чIчIедал алжаналда вукIина.

Гьев кIудияв шайхасул шакатал хъвазе ккани,

Катибзабазул къалмил къагIида рекъеларо.

Гьесул карамат бицун малаик хIайранлъила,

Нужум гIелму цIаларал гIалимзаби хIинкъила.

Гьесул рухIалъе гIоло цохIо чамасдак кьуни,

Зулму-хIал тIаде щведал, хIалае цеве чIчIела.

Гьесул силсилаялъул силкалда хварав мурид,

РухI бахъулеб сагIаталъ сагIдиявлъун гьавула.

Аллагьасдеﷻ къокъине къоял гIунтIараб мехалъ,

Аллагьасдаﷻ цеве чIчIун, мунажатал гьарила.

Гьаб загIипаб къавмалъул къварилъи рорхе абун,

Къиямасеб къоялда гьезул хIал бице абун.

Аллагьасулﷻ рахъалъан игьлам гьабун бачIина,

ХIикматазул киртазул кIулал гьесухъе кьунин,

КIалчIван гьекъе хIакъикъат ХIабибасул хIордасан.

Аллагьасﷻ изнуги кьун, Расулуллагь кIалъала.

КъутIбуясул гIарзалъе бичас жаваб гьабидал,

Зодов вахун Сайидас шикаятал гьаридал,

ЖужахI тIадал гIадамал гIутапаал лъугьина.

АхIмадил умматалъул щунусазаравго чи,

ЦохIо мунажа гьабун, жужахIалде рачуна.

Накъшубандалъул шайих гIаршалде вахун вуго,

ГIазабалъул гIадамал, гьарун, тархъан гьаризе.

АнцIила кIиазарго баркат ракьалде щвана,

РекIел къварилъи арал къоял диде рачIинчIо,

Аварагасулﷺ уммат ургъалида кин тараб,

Киналго даражаби вализабазеги кьун?

АхIмадил гьаб къавмалде къварилъи кин тIамураб,

Кинабгоги махлукъат дуца бижараблъидал,

Кинабго тайпаялъе тапавут кин гьабичIеб.

Кинабго къадар хъвалеб къалам дур кодоблъидал,

Гьал махIрум гьариялъе хIикмат щибдай, БетIергьан?

Гьелъул хIикматал лъалев хIаким мун гурев гьечIо.

Гьезухъ бухIулеб керен кидаго дир ссвинаро.

Гьесул мунажаталъе жаваб щвана Бичасул,

АхIмадил умматалъе рохел щун ракI бохараб.

ГIободиясул гIарзал зобалазде рахиндал,

Аллагьасﷻ къабул гьабун къварилъаби рорхана.

Дуде махIабат кколин Аварагасулﷺ уммат,

Алжаналъул тIохазда рохалида рукIине.

Эб дур силсилаялъул силкалда ругел чагIи,

Салсабилалъул хIорда хIавраалгун рукIина,

Къваридаб умматалда эб гьекъезе гьабила.

Гьеб дур тIарикъаталъул рахас ккурал гIадамал,

Нуралъул пардав борхун Барзахалда рукIина.

Гьаб жиндир умматалъе гьесул кумек бихьидал,

Карбилаалъул балагь ХIабибасда кIочана.

Балагь щварал гIадамал жинда жанир рукIунеб,

Дарул балаин абун Аллагьасулﷻ рукъ буго.

Гьеб рукъалъул хиралъи, хIавраазул берцинлъи!

Гьеб рукъ гIадаб къачIараб рукъ Аллагьасﷻ бижичIо,

Хирияб агьлуялде балагь гIемер бачIуна.

Жаннатул маъваялда Аллагьﷻ вихьун хIалхьезе.

Иман камиллъанани, курбатал гIемерлъула,

Карбилаалда чIварав ХIусенги данделъила.

Чан хирияв Аварагﷺ ургъалилъе рехарав,

Абадияб рокъове макъамалде ваккизе.

Накъшубандалъул шайих Аллагьасдеﷻ гьардедал,

Гьесул мунажаталъул бутIа гьесие щола.

Гьесде инкар гьабурал гIалимзабазде тIаде,

ГIажаибал балагьал Аллагьасулﷻ рачIуна.

Жинда рекъечIеб рагIи гIадамаца абидал,

РахIматалъул рагьаби рахан щула гьарула.

ТIолго вализабазул жамагIат бачIаниги,

Къараб рагьу рагьизе къуват гьезул тIагIуна.

Сирру-рабан цIаларал кIудиял гIалимзаби,

Гьелъул кIалтIу рагьизе къуват гьезул батичIо.

Кинабго Аваристан инкар къотIун руссиндал,

КъутIбуясул гьариялъ балагьал нахъе чIвана.

МухIамад Аварагасﷺ разилъун изну кьедал,

Щула гьабураб кIалтIу кIул гьечIого рагьана.

Гьанже рачIа гIодизе гIарипасда ракI бугел,

Муъминзабазул эмен ун рагIулин кодоса.

МухIамадил Бухари холелъул тIаде щвана,

Халкъалъул муршидасул рухI бахъизе рекIиндал,

МухIамадил Увайси мусру босун вачIана,

Накъшубандалъул шайих къадаралде щванилан.

Сайид- Амир Кулани кваранаб рахъалъ чIчIана,

ГIарипу Ривкарими квегIаб рахъалда чIчIана.

Салам кьун ГIабдулхаликъ гIедегIун тIаде щвана,

Юсупун Гьамданияс гьумералда баана.

АхIмадун Саргъандияв сверун лъугьун цIалдана,

ХасмухIамад Ширвани, МухIамадул Ярагъи,

Жамалудин Гъумукъи, ГIабдурахIман Сугъури,

Накъшубандалъул шайих дуниял тун унелъул,

Киназулго равхIани гьесда аскIор рачIана.

Бакъ-моцI буго къварилъун, къоял руго чIегIерлъун,

Зобал руго багIарлъун, ГIарш-Курс буго гьалаглъун,

РахIматалъул бахIарав лахIтуялде чвахидал.

Чара хвана халкъалъул халафа хун ватидал,

ГIаламалъулго чирахъ чи гьечIого хутIидал,

Алжаналъул хIавраал ракI гъезе тIад рещтIана.

ГIободияв чуризе Маккашариф лъугьана,

Зам-замалъул лъим босун Байтулагьалда аскIоб.

Гьеб рукъалда жанисан кIудаб гьаракь рагIана:

Чуруге гьев халафа, хун вугин гьев шагьидлъун.

Гьабизе жо лъачIого Маккашариф хутIана,

Жинца гьев чурилилан къотIи гьабун букIиндал.

КIиабизе рагIана цойги амруяб гьаракь:

Чуре дуца гьев муршид цIакъго хIурматаб хIалалъ.

Лъабабизе рагIана гьебго рокъосан гьаракь,

- Аллагьасулﷻ рахъалъан гьеб букIин якъинлъана.

Цебе гьаракь гьабураб хIал хъубаб щайтIан буго,

ЧуричIого халафа хабалъ лъезе бокьараб.

КIиабизе кIалъарав Хизри авараг вуго,

Жаназадул как базе ЖабрагIилгун вачIарав.

Зам-замалъ черхги чурун Маккаялъул хабзалалъ,

Хадижатида аскIов МугIалаялда лъуна.

Гьаб халкъалъул агьлуялъ гьесул адаб гьабичIо,

Гьалаглъана Дагъистан, тIаде бачIана балагь.

Мажгиталги къакъана, къварилъаби рачIана,

Вакъфу, чирахъ тIагIана, тIибитIана пасалъи.

Нужей бокьун батани зулму тIаса босизе,

Гьев къутIбу вакил гьаве Аллагьасдаﷻ гьаризе.

КъутIбуяс гьаранани Бичас жаваб гьабула,

Иншааллагь сверила цебе букIахъе дунял.

Купру, исбат, истизат атIрапазда расенлъун,

РекIел берал рагьарал муршидзаби тIагIана.

КъутIбуясул тIарикъат, тIагьаясул сиярал,

Салафазда малъарал маъзунзаби лъугIана.

РекIел кIудияв муршид ПирмухIамадхIажияв,

Пирдавус алжаналда даимавлъун гьавеги,

ТIолго нилъер халкъалъе шапагIат гьабулевлъун.

Лъим дагьлъидал гьабилги свера-тири дагьлъула,

Дунял тун Сайид индал, ратIаифал дагьлъана.

ТIавус аскIоб бугони, тIанчIи цIакъ расандула,

ТIаса къутIбу къотIидал къалбуялъ зикру тана.

Пуружин тIуни сагIат сверичIого букIуна,

Кьурулеб цIал бекидал султIану-зикру чIана.

ТIолго аварагзаби, киналго авлияал

Ана гьеб Бархазалде панаяб дунялги тун.

Огь, мискин дун, пакъир дун, къачIадуларев щай дун?

ГIисяналъул гIор гьекъон гIорцIуларев пакъирас,

ШапагIаталде хьул лъун, назму данде гьабуна.

Илбисалъул чу рекIун чороклъарав катибас,

Баракат тIалаб гьабун ГIободияв рехсана.

ГIалимзаби руссараб берцинаб мажлисалда,

АхIе СайидхIусенил гьидаятлъун букIине.

Гьаниб хъван буго:

Аллагьасул хирияб калам Къуръан хъван лъугIана Аллагьасул кумекалдалъун жив загIипав лагъ МухIамадхIажи ГIободияс, Къебед Хунзахъи аль авариясул васас, щаматкъоялъ, джумадул ахир моцалъ, 1289 соналъ, кIиабилеб нухалъ ХIежалде къокъиналде цебе.    Август 1872 сон

ИНХОСА РАСУЛ

Дагъистаналъул жавгьар, къарнуялъул мужадид

-Сайид ГIободиясул хвалил хабар бицинин.

Аллагьасухъﷻ паналъун, ХIабибасухъ гIащикълъун,

Муршидул Камилица рехун тана Дагъистан.

Исламияб ракьалъул бакьулъ гурон чIеларин,

Мака-Мадина гуреб гьесие къабуллъичIо.

КагIба рукъалъ къалъараб къибла бугеб хазина,

ХIабиб гьавураб шагьар гьесие хиралъана.

Хирияб Равзаялде зияраталъ хьвадизе,

Бадругин УхIудалъул шугьадаазде щвезе,

Аллагьасулﷻ рукъалда тIавап гьабун сверизе,

ГIарапалъул магIарда Ибрагьимихъе швезе,

Алжаналъул ганчIида квер хъван баракат щвезе,

Зам-замалъ каки чурун кинабго мунагь ине,

АхIмад жанив гьавураб хIужраде салам кьезе,

Марям, Асият щвараб азбар бихьун хIалхьезе,

ХIабиб жинда разияй Хадижат бикаялъул

Хирияб хIужраялде хIурмат гьабун хьвадизе,

Дагъистаналъул гъалбацI шайих Шамил вукъараб

БакъигIалъул баракат киназего бикьизе.

Аллагьасﷻ квер бакъана, кинабго тIокIлъи щвана,

КIиябго ХIарамалъул баркаталда квер лъуна.

ГIемер замана инчIо, ичIго-анцIго сон бана,

Азаралда лъабнусго хадуб анцIила лъабилъ

Маккаялда накълулъун тана пана-дуниял.

Муршидул Камиласул накълулъи лъазабизе,

МугIаллаялда лъезе ихтияр тIалаб гьабун,

МагIарулазул гIалим Маккаялда жив чIарав,

МалламухIамад Къарахъ ханзабазухъе ана.

Гьеб хабар баянлъидал ханзаби пашманлъана.

Маккаялъул ханзабаз харж букIана тIад лъураб,

Лъабго месед кьечIого чи вукъизе толареб.

Ужра тIалаб гьабичIо кагъат кодобе кьуна,

Шайихзабазул букIнилъ бакьулъ вукъеян абун.

Къарнуялъул мужадид жиндий бокьухъе вукъе,

Бокьаралъув вукъизе рекъарав шайих вугин.

МугIаллаялъул агьлу киналго разилъана,

Гьесул баркат-рахIматалъ киназдаго нур балин.

Гьеб къоялъ киназгоги хIалтIи-пиша рехана,

ГIаламго къватIиб бахъун МугIаллаялде ана.

Киналго шайихзаби рукъулеб бокIоналъул

Бакьулъ вукъун, къимат кьун, кIодо гьавуна Сайид.

ГIабдулхIамид Ширвани щив чияли гьикъани-

«ИбнухIажар» тIехьалъе хIашия гьабурав чи.

Дагъистаналъул шайих ГIободияв гурев чи,

МугIаллаялъул хабалъ мухь босичIевлъун гьечIо.

Муршидун Камиласухъ кинабго халкъ гIодана,

Къарнуялъул мужадид жиндий бокьухъе вукъе.

ГIалимзабазул керен кутакалда бухIана,

Загьир, батIин бикьулев къарнуялъул мужадид,

ГIаламалъе камидал кутакалда бакIлъана.

Ахир заманаялъе Аллагьасﷻ кьураб нигIмат,

Кодоса босун индал сорона киналгоги.

Аллагьасулﷻ гурхIел-цIоб, ХIабибасул баракат,

ГIобода вижарав гьев МугIаллаялда вукъи.

Цогидал мугIжизатал рехсезе хIажат гьечIо-

Пирдавусалъул агьлу гьалмагьлъиги гIеларищ!

ТIарикъаталъул муршид, къарнуялъул мун Имам,

ГIараб-гIажамиялда жавгьар бекьарав Сайид.

РухI бахъулеб заманалъ киналго хIайранлъана,

Кутакаб зикру бачун, пана гьабуна гIалам.

Иман, ислам, шаригIат, Аварагасулﷺ суннат,

Васиятал гьаруна воре аманатилан.

Шагьадат камил гьабун, кинабго мухIкан гьабун,

Камилаб иманалда къанщана чIегIер берал.

Хунин чIагойин абун гьесул батIалъи гьечIо,

Жиндида хурхарав чи, махх гIадин, гьес цIунула.

Муридзаби цIунизе цIодораб къуват буго,

Къарнуялъул кинабго гьесда кодосан буго.

ГIараб, гIажамиязе гьесдасан баркат буго,

Гьев Имамлъи лъазабун хадур рилълъин тIалъула,

Хабал питнаялдаса хвасарлъизе бегьула.

ГIараб улка-ракьалъул гьесде зиярат буго.

Дагъистаналъул халкъалъ хасго хIурмат гьабула.

Гьесул нухтIасан арав ГIалиюналде уна,

ГIамал бацIад гьабуни, Пирдавусалде цIала.

Маккаялъул МугIалла нилъее рикIкIад буго,

ХIалимат - эбелалде цо-цо ГIоротIе ракке, -

Сайидасул равхIани гьениса камуларо,

Мурадалде щвечIого мун нахъе вуссинаро.

Ахир заманаялъул жагьилал лагъзал руго,

Чорокал ратаниги тоге ниж МахIшаралда.

ГурхIулев Аллагьасдаﷻ гьарула муридзабаз,

Сайид ГIободиясул даража тIокI гьабеян.

ХIабибасде щвезегIан гьесул силсилаялде,

Ссвин гьечIел дур цIобазул цIадал чваххизареги.

Гьезул баракатазул бутIа камун ниж тоге,

РухI бахъулеб сагIаталъ гурхIалил чирахъ баке.

АлхIамдулиллагь, Аллагьﷻ, кидаго камичIого,

Камилаб умматалъул агьлулъун ниж гьарурав.

Салат, салам, баракат- кинабго Равзаялде,

ХIабиб разиябщинаб бакIалде щвезабизе.

ЦIаларасде васият, хъварасе дугIа гьабе,

Нужее щваралдаса бутIа камунги тоге.

Гьари буго кутакаб кинабго агьлуялде,

Адаб гьечIого гьаб тIехь нужеца цIалугеян, -

Адабалда цIалани, цIикIкIараб бутIа щвела.

Берцинго валагьани бергьенлъи духъ хутIила.

Берал чваххизаруни дуде чи вахунаро.

ГIамал гьабун хьвадани гIайиб дуда хъваларо.

Къанал чIвараб сордоялъ басралъи дуе гьечIо,

МахIшаралъул къоялда къабихIлъун хутIиларо.

 

КЪЕЛЕСА ХIАЖИ

 Сугъурияв устар, гъавсасул халип,

Хиял буго дуде мун разилъани.

Дагъистан тIегьарав Ярагъиясул

Квер гIунтIулеб мухъилъ дуца телилан.

МугIала разияв ГIободиясул

Муридлъун вукIине изну кьелилан.

Къарнуялъул Имам, гьари кIудияб

ЧIорого рачIарал чIваге ниж нахъе.

Ахир заманлъидал купру борхараб,

ХатIалъи камурав мурид кив вугев?

Нуж руго кутакал кинабго лъалел,

Камураб бацIине гьунар кьун тарал.

ГIинтIидул тIегьалда тIад месед бекьун,

РабитIа къачIазе къуват кодосел.

ГIуж-куц гьабуниги вирд къабул гьабун,

Камураб-т IокI лъараб битIизабулел.

Силсилаялдехун ахIи барасе,

ХIалае жал щолел, гьари тIубалел.

КигIан къабихIалги къан кквезе кIолел,

Гьунар кодобе кьун бокьухъе тарал.

КIикъого бакIалда мурид цIунизе,

ТIубараб ихтияр кодобеги кьун,

Камилаб нухалде халкъ тIобитIулел.

ТIадабщинаб малъун, щулалъуде цIан,

Нужеда хурхарал рухI кьун цIунулел.

Аллагьанﷻ гьардолел хехго рагIулел,

ХIабибан гIодулев чи гъоркь толарел.

ЛъикIалде ракI цIарал цIергIадин лъалел,

Мохъил агьлуялъухъ ишан ккун ругел.

Иншааллагь, нижер гьари нужеде,

КIиябго рукъалъул ниж гъоркь тогеян.

ГЕНУСА НИГIМАТУЛАГЬ

РачIая гIинтIамизе гIищкъуялъул цIа бугел,

ГIободи-къутIбуясул къисаби лъан рукIине.

Къалам-щакъиги босун шигIру гьесде ахIизин,

Курмузе сабабалъе Сайидасул бицинин.

ТIагьаясул амругин умматалде вачIарав,

Пихъил цIураб гъветI гIадин, гIаламалде гьурщарав.

Багъдадияв Халидил тIарикъат жинца ккурав,

ТIагьаясул гьаб уммат исламалде ахIарав.

Исламалъул жамагIат жинда тIаде гьетIарав,

Караматгиму кашфу капураздаги лъалев.

Ццин бахъун полковникас калам жинде гьабидал,

Каранда чIчIун гъалбацIаз жиндие квер бакъарав.

Нахъехун кверал рухьун витIизе къасд букIанин,

Квер хьвагIун нахъе аян хIинкъун жинда кIалъарав.

Мусаде ПиргIавн гIадин, ццин бахъун кIалъалелъул,

Каранда чIун хIалбихьун къотIун цевесан анин.

Нахъехун кверал рухьун капурзабаз витIилищ,

Каранде диналъул нур даимав ГIободияв.

ГIурусазул солдатаз туснахъалде рехилищ,

Ункъавго Имамасул тIурукъал ккурав Сайид.

КагIбаялде хIеж гьабун ХIабибасде унелъул,

Нух букIкIине гьабизе Аллагьасﷻ изну кьурав.

ХIабибасде гIащикълъун гIедегIун вилъунелъул,

ГIарабиязул мугIруз гIодун магIу гьабурав.

Расуласул росулъе Мадинаялде щведал,

Равзаялдеги къулун къанщун магIил ихх тIурав.

ХIабибулагьасул рухI Равзаялда бихьидал,

Халкъалъул Сайидасе салам гьабун къанщарав.

Караматал камилав, кашфу ннажат дурусав,

Кверал росун, салам кьун, Расулас нухда лъурав.

Жиндир загIипаб уммат исламалде ахIизе,

ХIабибас маъзум гьавун махлукъалде витIарав.

Аллагьасулﷻ къудраталъ санаъ ракIалде кканин,

Сах бугеб сипаталъул сурмалъун кьер хисарав.

Бичасде хIелхIедеян ХIабибасда гьаридал,

Жавгьаргун-якъуталъул жиндир нур накълулъарав.

Къаденахъе бакъ гIадин, къутIбуяс мугъ балелъул,

Мадинаялъул мугIрул жинда хадур гьетIарав.

Караматал гIемерав ГIободияв Сайидас,

СукIун рачIунел мугIрул, квер хьвагIун, нахъе чIвана.

ЧIахIиял байдабазда булбул гIадин вилъарав,

Шамалъул улкаги тун КагIбаялде гIунтIарав.

КагIбаялъе салам кьун Сайид жанив лъугьиндал,

КагIбарукъалъул къедалъ къулун салам гьабурав.

Бичасул саламги щун Сайид унеб мехалда,

Макказул сипаталда малайкзаби рачIарав.

ГIободияв Сайидас сапаралде къасд лъедал,

Къойил цIалулел жузаз чIегIер банин ахIарав.

Дунялалъул цо бутIа цебего кьурав Сайид,

Дуца дуниял тедал зоб-ракьги пашманлъана.

ТIадегIанаб даража дуе хIакълъарав Сайид,

ХIакълъун берзукьа индал маъзумзаби угьдана.

Халкъалъул Аварагасﷺ ун вуго устар ахIун,

Кавсаралъул лъим гьекъон, лъикIал чагIалъ вукIине.

ГIаламалъул канаб моцI гIаршалде вачун ана,

АсхIабзаби руссараб сурпаялда кIусизе.

ЛавхIалъул къоноялда къутIбуйилан цIар хъварав,

Тохлъизе нилъги гьарун ворчIана алжаналде.

Жиндир маъзумзабазда аманат нилъер гьабун,

ЦIан вачана Аллагьасﷻ жиндир алжан бихьизе.

ХIайранлъун муъминзаби хадур ралагьунги тун,

ТIагьаяс квералги ккун, берзукьа тIерхьун ана.

Киналго муридзаби зигардизеги гьарун,

Завалалда канаб моцI ГIизраилица ккуна.

ГIаламалъул къутIбуян Къуддусалда цIар хъварав,

Къвалзукье къан Сайидгун Исрапилихъе кьуна.

Хараплъараб Дагъистан диналде ахIун хадуб,

Аллагьасулﷻ къадар щун, Барзахалде вачана.

Расуласул шаригIат халкъалда малъун хадуб,

Амру гьабун Аллагьасﷻ Пирдавсалде витIана.

Гьесул къиса бицарав Генуса НигIматулагь,

Назмуялде бахъарав Миякьуса МухIамад.

ГIободиясул маъзум устарасде кIанцIарав,

Эсул муридзабазул чIитIиралъулъ хьвадарав.

Дида амру гьабурав, гьабизе дун тIамурав,

Диналъе чаран гIадав Халилил вас ХIажияв.

ТIолго муридзабазде нижер аманат буго,

Нижгун нужер умумул дугIадулъ кквеян абун.

Нижергоги хьул буго даимго устарасде,

Эсдасан вирд босарал тIолго муридзабазде.

Устар ПирмухIамадий Аллагьасﷻ гIумру кьеги,

ГIибадат-тIагIаталъе Аллагьасﷻ тавпикъ кьеги.

ТIолго даражабазде Бичас вахинавеги,

Дунял ахиратги кьун алжан насиб гьабеги.

Кинабго халкъ бахунеб СиратIул кьодул кIалтIа,

ТIолго муридзабигун Бичас вохизавеги.

Пашманлъун къварилъараб къиямасеб къоялда,

Къвалзукье нилъ рачине къутIбуе къуват кьеги.

Беразул тIелхаздаса тIеренаб СиратI-низам,

Муридзабазул богин вихьаги алжаналъув.

Жиндир шагIну кIудияв ГIободияв къутIбугин,

Къокъа гьабун ритIаги Жанатул Пирдавсалде.

ТIуран ккана акъвалал КъутIбуясул рицарал,

Къварилъарал чучулел, чурхдузе рахIат бугел.

 

ХЕЛЕКЬУРИСА ГIАБДУЛАГЬИЛ МУХIАМАД

 ГIужбуялъул кIкIуялъ рукIкIараб дунял,

Дагьаб хIал чучизе хIалго кьеларищ.

ХIасадалъул цIаялъ цIураб Дагъистан,

Дие квербакъизе къуватго гьечIищ.

Къуръан-гIелмуялде гIарза буго дир,

ГIарзул хIал босеян ХIабибасухъе.

ХIадис-тапсиралде гьари буго дир,

Гьаб дир унтиялъе дару гьабеян.

Дунялалъул чIухIи чIаголъизедай,

ЧIван букIараб байрахъ муршидзабаца.

ЩайтIанияб мурад тIобитIизедай,

ТIарикъат малъараб мащаихзабаз.

Инналиллагь, гьанже гьал гIадамазул

Гьабулеб гIамалги гIазаималги!

ГIажаба халикъат холеб бугеб куц,

Хиялада рекъон тIарикъатги цIан.

РакIалда зикруялъ асар гьабуни,

Устарзаби каки кин гьуинлъулеб?!

Каранда диналъул нур жиндир бугев

Лълъвинадай къеркьезе вализабигун.

Валгьан цебе тIамун тIагIатги гьабун,

ТIубаладай мурад муридзабазул.

Макъамал росарав саликинасда

Вацазул гьан кванай кинан букIунеб.

РекIел арканазда илбисги хIалтIун,

ЧIухIун гьабулеб жо дин букIунаро.

ДагIба гIемерасул дин камиллъулин,

Кибдай хIадис буго ХIабибас бицун?

ХIасад цIикIкIарасе цIар букIунилан,

ЦIалулел аятал дида рагIичIин.

РекIел пахру, хиял хараплъичIони,

Хайир бице дида дин гьабиялъул.

Дунявияб тIалаб тIагIин гуребищ

ТIагIаталъ малъулеб муъминзабазда?

Муршидзаби рихун гьабулеб гIамал,

Гьабаун мансурлъун сверизе буго.

СалихIинал какун бакараб цIаялъ

Керен-ракI бухIила хIасадчагIазул.

Бичас хIарбуялъулъ хIинкъи кьун буго,

ХIакъав загьирасе зарал гьабуни,

Зоб-ракьалъе бакIаб кьола нагIана.

ГIирпаналъул агьлу угьдизабуни,

Унтарал беразул гIадат букIуна,

Бакъул канлъиялде инкар гьабулеб.

Кванил лазат лъачIел зугIапааца,

Загьруян цIар лъола найил гьацIуда.

Нураниял гьурмал ракьулъ тIерхьиндал,

ТIекъал хабарал те, хириял вацал!

Халкъалда гьоркьобе кьал рехичIого,

Кьурал вирдалги ккун гIенеккун рукIа.

ГIободияс ракун Дагъистаналда

Диналъул чирахъал чанги рукIанин.

Хирияв Сайидас суннатги цIунун,

Сулукалъул магIна малъун букIанин.

Миллат цIуни цIакъав къутIбуяв гъавсгун,

Къацанди гьабулеб агьлу тIагIинчIо.

ТIарикъат гIуцIарав гIарипинасде,

ГIицIаб дагIба балев гIадан камичIо.

Дица Хушдадиял хаважагьазе

Хасаб бакI букIана рекIелъ гьабулеб.

Гьезул баракаталъ канлъи бачIараз,

Карамат бициндал, цин-цин мехтула.

Манакъибал хъвазе гьукъула кверал,

Гьезул макъамалъе мукъсан ккелилан.

Лъарал караматал каранда тола,

Кирамалъул иршад гьелда гьечIелъул.

Дун мукIурав вуго КунтахIажие,

Кашфу-варагIалъул мегIер вукIанин.

РакI-ракIалъ шагьадат гьев шайихасе,

ШаънухIал бацIцIадав моцI вукIиналъе.

Кунта ТашавхIажил сиядаталъе

Сайид ГIободияс нугIлъи гьабуна.

Гьезул къадру-къимат, макъам рагIарав,

Якъин бацIцIадав чи чапун тIагIина.

ТIагьал нухда хварал хулапаазда

Хилапалъул агьлу пенщелел руго.

ПитIна гIатIид гьабун, дин тIерен гьабун,

ТIарикъаталда гъорлъ рекъон рагIичIо.

Цоцалъ жахIда бугел хIасадиназе

ХIуснул хатимат щвей щакаб жо буго.

Жалго загьирлъизе, зикру тIагIине,

Зам-зам хIакъ гьабулеб агьлу кинаб жо?

Инкар хIасуллъулел хIавадисазда,

МахIмуд-апандил ракI разилъиладай?

Рабанияб къокъа къварид гьабеян,

Къавлуго бихьанищ тIахьазда хъвараб?

Ракьалда рагIарал гIарипиназде

ГIунтIизе гьаруге батIулал ишал.

Авлияазулгун дагIба батани,

НугIзал къваригIина къабул гьабулел.

Къуръан-хIадисалде иман лъолеца,

Умурал тIамун те БетIергьанасде.

ТIагьал агьлуялъе-устарзабазе,

Таслим тIадаб буго бусурбабазда.

Гьал сидикъиназул адаб тарав чи,

Теларо Аллагьасﷻ бергьун хьвадизе.

Гьал рехсаралщинал, ирга щвечIелги,

Шуюхазе щваги ризванул акбар.

Гьезда хадуб унеб ахираб къоялъ,

Къудрат кIудав РахIман, гурхIа ниже да.

Салат-салам лъеги Аварагасдаﷺ,

Гьал сайидзабазда низам малъарав;

Агьлу, асхIабзаби зурияталда,

Уммат тIобитIизе тIалаб цIикIкIарал.